Нохчийн меттан институтехь дӀадаьхьира дешархой а, хьехархой а совгӀаташца билгалбахар

Тахана, эсаран беттан ткъе борхӀалгӀачу дийнахь, Нохчийн меттан институтехь дӀадаьхьира Нохчийн меттан Денна лерина дӀабаьхьначу къовсамашкахь толаме меттигаш йаьхначу республикерчу ишколашкара дешархой а, хьехархой а совгӀаташца билгалбахар.

Шен къамелехь институтан директора Умхаев Хьамзата билгалдаьккхира хьехархоша дешархошца цхьаьна къахьоьгуш бечу балхо дика жам1аш гойтуш хилар. Цунна тоьшалла ду таханлера цхьаьнакхетар.

 

 

Институтан коьртачу Ӏилманан белхахочо Вагапов Ӏаьрбис ишколехь дешар ненан маттахь хила дезарх лаьцна къамел дира цхьаьнакхетарехь.

Берана шега дуьйцучух кхетар ненан маттахь бен хуьлийла дац аьлла, билгалдаьккхира цо.

2019 – 2020-чуй дешаран шарахь Нохчийн меттан Денна лерина дӀабаьхьначу «Нохчийн меттан тоьлла кабинет», «Нохчийн маттахь тоьлла сочинени» къовсамийн жамӀ деш, мехалчу совгӀаташца толамхой билгалбехира институтан куьйгалхоша:

Соьлжа-ГӀалин № 47 йолчу йуккъерчу ишколан 9-чу классан дешархо Амаев Мустафин Адам, Соьлжа-ГӀалин Ю.Д. Дешериевн цӀарах йолчу лингвистически ишколан 11-чу классан дешархо Хасуев Мохьмадан ИсмаӀал, Хьалха-Мартанан муниципальни кӀоштан Олхазар-КӀотаран № 2 йолчу ишколан 9-чу классан дешархо Джукалаева Русланан Карина, Соьлжа-ГӀалин  Ю.Д. Дешериевн цӀарах йолчу лингвистически ишколан нохчийн меттан, литературин хьехархо Ахматова Аухьадан Зулихан, Соьлжа-ГӀалин № 4 йолчу гимназин нохчийн меттан, литературин хьехархо Хумакиева Хасмохьмадан Зараъ, Соьлжа-ГӀалин № 47 йолчу йуккъерчу ишколан нохчийн меттан, литературин хьехархо Бектамирова Нохьин Асет, Невран муниципальни кӀоштан Новотерски йуьртан йуккъерчу ишколан нохчийн меттан, литературин хьехархо Закриева Акхбердан Лариса, Хьалха-Мартанан муниципальни кӀоштан Олхазар-КӀотаран №2 йолчу ишколан нохчийн меттан, литературин хьехархо Магомадова Хьаьжин Роза.

Цхьаьнакхетар дерзош, Соьлжа-ГӀалин Ю.Д. Дешериевн цӀарах йолчу лингвистически ишколан нохчийн меттан, литературин хьехархочо Ахматова Аухьадан Зулихана шен а, шен накъостийн а цӀарах баркалла олуш къамел дира, шайна совгӀаташ даларна а, шаьш бен болх тидамехь латторна а.