«Тоьлла нохчийн меттан кабинет» цӀе йолу республикански къовсам

Нохчийн Республикин дешаран а, Ӏилманан а министерствон омрица Нохчийн меттан институто xӀopa шарахь дӀахьо Нохчийн меттан денна лерина «Тоьлла нохчийн меттан кабинет» цӀе йолу республикански къовсам.

Мехк-Дас Кадыров Ахьмад-Хьаьжин Рамзана боккха тидам тӀебохуьйту нохчийн мотт кхиорна а, и Ӏамо хьелаш кхолларна а. Цо билгалдаьккхина: «Нохчийн мотт бийцина ца Ӏаш, ойла а нохчийн маттахь йан йеза вай...».

Нохчийн Республикин дешаран а, Ӏилманан а министерствон 2023-чу шеран бекарг беттан 9-чу дийнахь арадаьллачу № 387-п йолчу омрица догӀуш, республикерчу дешаран хьукматашкахь оханан беттан 1-15-чуй деношкахь дӀабаьхьира «Тоьлла нохчийн меттан кабинет» цӀе йолу республикански къовсам. Къовсамехь дакъалаца билгалйаьккхина йара кӀоштан къовсамехь хьалхара меттигаш йаьхна 14 ишкол.

Республикерчу дешаран хьукматашкара нохчийн меттан кабинетийн экспертиза йан (мах хадо) Вовшахтохаран комитето комисси билгалйаьккхинера:

– Ш.И. Абдуразаков, институтан дешаран методикица кхачойаран центран доладархо – комиссин председатель;

– Л.С. Тутаева, институтан лакхара Ӏилманан белхахо – комиссии декъашхо;

– А.П. Хунарикова, институтан лакхара Ӏилманан белхахо – комиссин декъашхо.

Къовсаман Ӏалашонаш:

– дешаран хьукматашкахь тӀейогӀучу ханна методически кхачойар, дешаран-коьчалийн база кхачаме йарехула дешаран эвсаралла лакхайаккхар;

– ненан (нохчийн) мотт баржор а, иза дӀахьехаран эвсаралла лакхайаккхар а;

– дешархой нохчийн меттан а, вайнехан синмехаллийн а ларам бан Ӏамор.

Декхарш:

– вайзаманан финансийн-экономикин хьелашкахь кабинетийн дешаран база кхачаме хиларан позитивни зеделларг гучудаккхар а, иза дӀасадаржор а;

– дешаран кабинетан статус лакхайаккхар;

– кабинетехь дӀахӀоттийнчу балхе хьаьжжана, дешархойн классера а, классал арахьара а болх жигарбаккхар;

– вайзаманан дешаран, хаамийн технологех пайдаэца хьехархойн лаам кхоллар.

ХӀинцалерчу хьежамашца, федеральни стандартийн лехамашца йогӀуш, нохчийн меттан, литературин хьехархойн дешаран-методикин кабинет хила хьакъ йолуш билгалйевлира:

– Соьлжа-ГӀалин № 5 йолу гимнази (кабинетан доладархо – нохчийн меттан, литературин хьехархо Исакова Наврдинан Бирлант) – 1-ра меттиг;

– Соьлжа-ГӀалин муниципальни кӀоштан Садови йуьртара йуккъера йукъардешаран ишкол (кабинетан доладархо – нохчийн меттан, литературин хьехархо Ильясова Аминат) – 2-гIа меттиг;

– Гуьмсан муниципальни кӀоштан Шоьнара йуккъера йукъардешаран ишкол (кабинетан доладархо – нохчийн меттан, литературин хьехархо Магомедова Ӏалавдин Элита) – 2-гIа меттиг;

– Хьалха-Мартан № 9 йолу йуккъера йукъардешаран ишкол (кабинетан доладархо – нохчийн меттан, литературин хьехархо Домбаев Вакхатан Хьамзат) – 3-гIа меттиг;

– Эна-Хишкан муниципальни кӀоштан Эна-Хишкара № 1 йолу йуккъера йукъардешаран ишкол (кабинетан доладархо – нохчийн меттан, литературин хьехархо Батаева Саданан Мадина) – 3-гIа меттиг.

ДӀабаьхьна къовсам рогӀера гӀулч йара Нохчийн меттан де даздарна леринчу гӀуллакхийн.